Nis punën komisioni për reformën zgjedhore, Gjiknuri: Ekspertizë nga Venecia

Komisioni i posaçëm për reformën zgjedhore ka mbajtur të martën mbledhjen e parë nën drejtimin e dy bashkëkryetarëve Damian Gjiknuri nga PS dhe Oerd Bylykbashi nga PD.

Në fjalën e tij, socialisti Damian theksoi se adresimi i rekomandimeve të OSBE/ODIHR-it për zgjedhjet do të jetë thelbi i këtij komisioni, për të cilën do të kërkohet edhe asistenca e komisionit të Venecias.

“Do t’i drejtohemi ODIHR-it dhe Komisionit të Venecias për vënien në dispozicion të ekspertizës. Më e ndershme është të niset me ato probleme të patrajtuara e që nuk kanë ngarkesë politike, siç ka qenë ligji për financimin e partive politike, jashtë fushatave zgjedhore”, tha Gjiknuri.

Bashkëkryetari demokrat i komisionit, Oerd Bylykbashi theksoi nevojën e adresimit të rekomandimeve të OSBE-ODIHR ndërsa nënvijëzoi se nevojitet reformë zgjedhore pas çdo palë zgjedhjesh.

“Tentativa e fundit për reformë ishte ajo e vitit 2020 që preku Kodin Zgjedhor e në fund fare u përmbys me një ndryshim të njëanshëm në Kushtetutë. Reforma e fundit konsensuale ishte ajo e vitit 2012 e që atëherë nuk ka pasur më. Keqqeverisja dhe krimi i organizuar në formë masive, ky komision duhet të ketë një qasje të pakufizuar dhe duke hyrë thellë në të gjitha tematikat”, deklaroi Bylykbashi.