Nis ndarja e shpërblimeve, pensionistët në radhë pranë postave, 5 mijë lekë bonus

Pensionistët që në orët e para të mëngjesit i janë drejtuar sporteleve të Postës Shqiptare për të marrë shpërblimin prej 5 mijë lekësh. Kryesisht në periferitë e qyteteve si Tirana, Korça apo Shkodra nisja e ndarjes së shpërblimeve është shoqëruar me radhë.

Kjo ka shqetësuar një pjesë të të moshuarve, të cilët u duhet të presin me orë.

“Bota ka numër, 1,2 ,3… me radhë. Unë erdha në ora 9, zura radhë, u bë rrëmujë, kështu do vazhdojmë ne?” – drejtoi shqetësimin e tij një pensionist.

Ndërsa pak ditë na ndajnë nga ardhja e një viti të ri, duket se festat këtë vit po priten ndryshe.

“Jo si vitet e tjera se kjo sëmundja na ka penguar, nuk e bën dot gëzimin si më përpara, që dilnim me shoqërinë. Tani jemi të izoluar, tani nuk takon dot as fëmijën as vëllain,” – tha një pensionist.

“Ne jemi nga ata pensionistët e vetmuar që i kemi fëmijët jashtë, rrugët u bllokuan, kështu që mbetëm këtu, sivjet do jemi vetëm,” – u shpreh një e moshuar.

“Jo të kënaqur nga sëmundja dhe nga gjendja ekonomike,” – shtoi një tjetër.

“Ndryshe do jenë, do mbyllemi në atë shtëpinë tonë me fëmijët,” – tha një i moshuar tjetër.

Nga shpërblimi i festave të fund-vitit përfitojnë mbi 600 mijë të moshuar, të cilët duhet të paraqiten pranë postave në datën kur marrin pensionin mujor.