Nis sot fushata zgjedhore për 14 majin, mesazhi i OSBE

Duke nisur nga sot starton zyrtarisht fushata elektorale për zgjedhjet e 14 majit. Fushata do të zgjasë deri në mesnatën e 12 majit, për t’i lënë hapësirë heshtjes zgjedhore më 13 maj e më pas ditës vendimtare të votimit më 14 maj.

Në një reagim në rrjetet sociale, OSBE bën thirrje për një fushatë të qetë dhe me qasje progresiste. “Shumë punë mbetet për t’u bërë dhe ne jemi të gatshëm të punojmë me ju edhe pas 14 majit. Ndërkohë presim që të zhvillohet një fushatë paqësore dhe e hapur ku konkurrimi politik të jetë sa më konstruktiv, në zbatim të legjislacionit shqiptar, standardeve ndërkombëtare”, shkruan mes të tjerash OSBE në postimin në facebook.

Ndërkohë në ditën e parë të fushatës për zgjedhjet lokale të 14 majit ka mbërritur edhe kritika e parë nga organizatat ndërkombëtare. Komiteti Shqiptar i Helsinkit deklaron se partitë politike nuk kanë respektuar Kodin Zgjedhor, pasi e kanë nisur fushatën zgjedhore para kohe duke theksuar se pjesë e këtyre takimeve kanë qenë edhe përfaqësues të administratës.

Në zgjedhjet e 14 majit 2023 kanë të drejtë vote 3,650,550 shqiptarë, nga të cilët 122,545 zgjedhës votojnë për herë të parë.

LEXO GJITHASHTU:

• Zbulohet data kur PD do të nisë fushatën zgjedhore, ja ku do të mbahet ceremonia
• Berisha fton shqiptarët për hapjen e fushatës: Do jetë fitore si e vitit 1992