Nis ulja e çmimit të naftës në bursa, pritet rishikimi i vendimit nga bordi

Nafta shitet në pikat e karburanteve me çmim 248 lekë. Ky është çmimi më i lartë që ka caktuar Bordi i qeverisë që nga 12 marsi, kur u krijua për të ndërhyrë në çmimet e lëndëve djegëse.

Edhe benzina është shtrenjtuar në 244 lekë, ndërsa gazi shitet 90 lekë/ litër.

Këto çmime janë vendosur pasi në javën e fundit të majit, çmimi për një fuçi naftë është rritur me 8% për të kulmuar në 122 dollarë në datën 31.

Por, për dy ditë me radhë bursa po shkon me rënie, pas njoftimit se Arabia Saudite po përgatitet të rrisë prodhimin. Deri më tani ky shtet, që është lider në furnizimin global, nuk ka bërë përpjekje për të ruajtur qëndrueshmërinë e çmimeve dhe furnizimit, pasi tregu nuk ka pasur mungesa.

Çmimi në bursë këtë të enjte ka shkuar 113 dollarë për fuçi, dhe ky nivel pritet të ulë edhe çmimin në pompa tek ne. Por që kjo të ndodhë nevojitet mbledhje e bordit, i cili e sqaron edhe në njoftimet që çon për mediat, se formulën e çmimit e lidhin me bursat ditore.

LEXONI GJITHASHTU:

• Bordi i Transparencës rrit me 19 lekë çmimin e naftës brenda një jave
• Bordi i Transparencës rrit çmimin e naftës