Takimi Kurti-Vuçiç në Ohër, Stano: Mund të zgjasë deri në mbrëmje

Zëdhënësi i Bashkimit Evropian për Punë e Jashtme dhe Sigurinë, Peter Stano, ka bërë me dije se ka nisur takimi mes kryeministrit të Kosovës, Albin Kurti dhe presidentit të Serbisë, Aleksandar Vuçiç.

Stano, në një konferencë të dhënë për mediat nga Ohri, aty ku po mbahet takimi trilateral, tha se takimi mund të zgjasë deri mbrëmjen e kësaj të shtune.

Zëdhënësi i BE-së deklaroi se në përfundim të takimit do të ketë dhe një konferencë për shtyp nga shefi i diplomacisë së BE-së, Josep Borrell.

Stano theksoi se gjatë konferencës për shtyp nuk do të pranohen pyetje.

“Nuk mund të deklaroj asgjë për takimet pasi përfaqësuesi i lartë, Josep Borrell, në fund të ditës do të mbajë konferencë. Nuk e di kohën dhe nuk e di se sa do të zgjasë takimi, dialogu në takime nuk dihet se sa mund të zgjasë – deri në mbrëmje ose dikur vonë pasdite”.

“Kur ky raund i ri i dialogut do të përfundoj atëherë përfaqësuesi i lartë do të dalë në konferencë dhe do të tregojë. Nuk do të them asgjë për përmbajtjen dhe njësoj veprojmë edhe në Bruksel. Nuk diskutojmë për atë që është duke u diskutuar në takim”, tha Stano.