Barnat për dobësim ulin peshën, por nuk përmirësojnë jetën

Barnat për dobësim si Wegovy dhe Mounjaro ndihmojnë njerëzit të humbin shumë kilogramë, por kjo nuk do të thotë domosdoshmërisht se ata ndihen më mirë ose sjellin një cilësi më të mirë jetese. Ky është përfundimi i një studimi të ri të publikuar në revistën mjekësore The BMJ.

Studiuesit analizuan 262 studime ku morën pjesë mbi 99 mijë persona dhe krahasuan 14 barna të ndryshme për trajtimin e obezitetit.

Sipas rezultateve, barnat më të reja, si Wegovy dhe Mounjaro, ishin më efektivet për humbjen e peshës. Megjithatë, për shumicën e barnave nuk u gjetën prova të mjaftueshme se ato përmirësojnë cilësinë e jetës së pacientëve ose ulin rrezikun e problemeve serioze shëndetësore gjatë vitit të parë të përdorimit.

Studimi tregon se Wegovy mund të ulë rrezikun e vdekjes, infarktit në zemër dhe insuficiencës kardiake. Ndërsa Mounjaro mund të ulë rrezikun e insuficiencës kardiake, por te disa persona është shoqëruar edhe me humbje të masës muskulore.

Autorët e studimit theksojnë se nevojiten kërkime të tjera për të kuptuar më mirë efektet afatgjata të këtyre barnave. Sipas tyre, deri tani është e qartë se ato ndihmojnë në humbjen e peshës, por nuk ka ende prova të mjaftueshme se përmirësojnë jetën e pacientëve në tërësi.