Nisin hetimet për krime lufte, Moska i cilëson të rreme imazhet e viktimave

Autoritetet ukrainase pretendojnë se pas largimit të ushtrisë ruse nga rajoni i Kievit janë zbuluar një numër i madh qytetarësh të masakruar.

Imazhet e raportuara janë dënuar nga shtetet perëndimore e është bërë thirrje që të hetohet nëse bëhet fjalë për krime lufte.

Prokurorët kanë zbritur në terren duke e përshkruar vendin një skenë krimi.

Kryeprokurori i Gjykatës Penale Ndërkombëtare ka qenë në Bucha, periferia e Kievit nga u publikuan imazhe sesi ishin vrarë civilë.

“Ne kemi edhe një ekip, ata nuk janë këtu për shkak të kamerave. Shkencëtarë mjeko-ligjorë, antropologë mjeko-ligjorë, analistë, hetues dhe avokatë, në mënyrë që të sigurohemi që të ndajmë të vërtetën nga trillimi dhe të vazhdojmë të këmbëngulim në të drejtën e çdo individi, çdo fëmije, çdo gruaje, çdo burri që të ketë jetë të mbrojtur dhe të mos jetë shënjestër e qëllimshme”, u shpreh Karim Khan, kryeprokuror.

Gjykata me bazë në Hagë heton dhe ndjek penalisht krimet e luftës, krimet kundër njerëzimit dhe gjenocidin.

Akuza më e fortë e presidentit amerikan Joe Biden, i cili e cilësoi gjenocid aksionin e Rusisë, është cilësuar e papranueshme nga Kremlini, i cili pretendon se imazhet e vdekjeve të civilëve janë “të rreme”.

LEXONI GJITHASHTU:

• Hapen 9 korridore humanitare për evakuimin e civilëve nga Ukraina
• Anija luftarake ruse në Detin e Zi dëmtohet nga zjarri