Një roman, një dramë, një ngjarje shqiptare bazuar në një histori të vërtetë të vitit 1943 vjen për herë të parë premierë në teatër.

“Vrasje në vjeshtë”, e ndërtuar mbi motivet e romanit “Njeriu i netëve të vjeshtës” të Gjergj Vlashit, u shfaq mbrëmjen e të mërkurës në Teatrin Kombëtar Eksperimental “Kujtim Spahivogli” në Tiranë.

Me Mehmet Xhelilin në rolin kryesor dhe Rafael Hoxhajn e të tjerë në skenë, shfaqja, e dramatizuar nga Stefan Çapaliku, na përball me absurdin dhe pyetjet e një individi që, duke rrëmuar qytetin, rrëmon ndërgjegjet njerëzore si një i vetëm kundër të gjithëve dhe pa asnjë mbështetje.

“Jemi të emocionuar, ishte kontakti i parë i shfaqjes me publikun. Shpresoj të ketë mbetur i kënaqur. Jam shumë i lumtur që jam pjesë e këtij projekti të Teatrit Kombëtar, me regjinë e Stefan Çapalikut”. thotë Mehmet Xhelili.

Ngjarja është e bazuar në fakte reale, të cilat lidhen me momentin kur ushtritë aleate, pas kapitullimit të Italisë fashiste, po ndërmerrnin sulme të befasishme, veçanërisht mbi prapavijat e ushtrisë gjermane. Në këtë kontekst, shërbimi inteligjent i ushtrisë gjermane ka grumbulluar të dhëna se aleatët mund të bombardonin portin e Durrësit me çisternat e karburantit, dhe me këtë rast do të shkatërrohej i gjithë qyteti që gjendej pranë.

Duke shpallur gjendjen e jashtëzakonshme, ushtria urdhëron evakuimin e qytetit, duke kërcënuar me eliminimin e atyre që kundërshtojnë.

Personi i vetëm që nuk i bindet këtij urdhri në romanin e Gjergj Vlashit është Marian Shkoza, një punonjës i thjeshtë i një agjencie detare, beqar.

Humbja e vetes dhe përballja me karaktere të tjera njerëzore e kthejnë atë në një njeri pa identitet dhe me një tjetër sistem vlerash dhe vlerësimesh, deri në ditën e “vetëdorëzimit” të tij ndaj një patrulle gjermane, që edhe e eliminon fizikisht.

LEXONI GJITHASHTU:

• ‘’Menaxheria e qelqtë’’/ Drama amerikane shfaqet në Gjirokastër
• Ndahen çmimet “Golden Globes”, filmi më i mirë dramatik “The Brutalist”