‘’Menaxheria e qelqtë’’/ Drama amerikane shfaqet në Gjirokastër

Drama amerikane “Menaxheria e qelqtë” ishtë shfaqja e vendosur në skenë në fundjavë nga trupa e teatrit “Zihni Sako” në Gjirokastër. Kjo dramë është ndër pjesët më të suksesshme të dramaturgjisë amerikane dhe vjen për herë të parë për publikun gjirokastrit.

Bazuar në jetën e dramaturgut të famshëm Tennessee Williams pjesa trajton një dramë familjare sa personale aq dhe universale. Drama “Menaxheria e qelqtë” u ngjit në skenë me një nivel të lartë artistik dhe interpretimin me talent nga trupa e aktorëve.

“Për mua e gjithë pjesa është një sfidë për shkak se “Menaxheria e qelqtë” është një nga pjesët më të rëndësishme të Tenes Wlliams i cili është një nga baballarët e dramaturgjisë amerikane dhe sigurisht nuk është kollaj që të trajtosh një autor të tillë por e rëndësishme është që u dha në Gjirokastër, publiku gjirokastrit e priti shumë mirë”, thotë regjisori Erjon Hinaj.

“Dua të falënderoj publikun, ishte i jashtëzakonshëm me gjithë reagimet e tij e ka ndjekur shfaqjen me shumë vëmendje dhe të gjithë ne aktorëve na bëri  thjesht ta shijojmë edhe akoma më shumë të gjithë shfaqjen.”, thotë aktorja Lejda Çeli.

“Të them të drejtën kam ndjerë një farë mungese në këtë premierë sepse më mungonin aktorët ikonë të këtij teatri por mund të them me krenari që tek kjo shfaqje, ne aktorët e rinj jemi munduar të ecim në rrugën e tyre dhe jam shumë krenar për këtë.”, thotë aktori Aleksandër Kondi.

Përgjatë këtij sezoni artistik në skenën e teatrit të Gjirokastrës janë shfaqur pjesë të autorëve shqiptarë dhe të huaj, interpretimi i të cilave është vlerësuar me duartrokitje nga artdashësit.

LEXONI GJITHASHTU:

• Bie numri i lindjeve në Gjirokastër, ja shkaqet kryesore
• Gjirokastra “atelie muzeale”, 25 restauratorë të rinj bëjnë praktikë për ndërtimet