Një peshkaqen me peshë 12 kilogramë është kapur sot në Neum, Bosnjë Hercegovinë. Bëhet fjalë për një lloj peshkaqeni blu – i cili konsiderohet si peshkaqeni më i rrezikshëm në Adriatik, sepse tërhiqet nga gjaku dhe mund të sulmojë njerëzit.

Peshkaqeni u kap nga një peshkatar vendas, raporton agjencia hercegovina.info.

Peshkaqenët blu nuk janë të pazakontë në detin Adriatik, por ata jetojnë në thellësi dhe rrallë i afrohen bregut, dhe nëse ndodh, është kryesisht në muajt e dimrit.

Peshkaqeni blu njihet nga trupi i tij në formë siluri, i cili e lejon atë të lëvizë nëpër thellësitë e detit me një shpejtësi prej 35 deri në 90 kilometra në orë, duke e bërë atë një nga peshkaqenët më të shpejtë në botë.

Ky lloj peshkaqeni e ka marrë emrin nga ngjyra blu e trupit të tij. Mesatarisht, ata rriten nga tre e gjysmë deri në katër metra dhe peshojnë deri në 150 kilogramë.