Një tjetër vaksinë falas, rreth 30 mijë fëmijë do ta përfitojnë

Një tjetër vaksinë falas u shtua në listën e kalendarit kombëtar të vaksinimit. Bëhet fjalë për vaksinën e Rotavirusit, e cila deri më sot kushtonte 100 dollarë dhe prindërit e kryenin privatisht.

Ministria e Shëndetësisë, përmes një statusi në Facebook shkruan se kjo vaksinë është në kalendarin e vaksinave që nga data 1 tetor dhe familjet shqiptare do të kursejnë tashmë 3 milionë dollarë.

Nga kjo vaksinë do të përfitojnë rreth 30 mijë fëmijë në vit.

Vaksina e Rotavirusit do të jepet me 3 doza nga goja për moshat 2, 4 dhe 6 muajsh. Sipas Ministrisë së Shëndetësisë, i gjithë stafi mjekësor është trajnuar për të ofruar këtë shërbim. 

Me futjen e vaksinës së re, kalendari i vaksinimit ka 12 vaksina të detyrueshme për fëmijët.

Po, çfarë është sëmundja e Rotavirusit?

Sëmundja e Rotavirusit prek foshnjat dhe fëmijët e vegjël. Simptomat që Rotavirusi mund të shkaktojë janë: diarre, të vjella, ethe dhe dhimbje barku.

Rotavirusi përhapet me lehtësi tek fëmijët. Ata mund të marrin Rotavirusin dhe nga një fëmijë tjetër që e ka këtë sëmundje. Kjo mund të ndodhi, nëse një fëmijë vendos në gojë duart e palara, një objekt, ushqim ose lëngje të kontaminuara.