Njihej dhe si “Visi i Pazarit”, si u zbulua polici i përfshirë në shitjen e kokainës

Ditën e sotme, Agjencia e Mbikëqyrjes Policore ka arrestuar efektivin e Forcave Operacionale, 38-vjeçarin Ervis Shkurta.

Shkurta dyshohet se ka qenë pjesë aktive e sigurimit të kushteve për tregtimin e lëndës narkotike nga tre të rinj që u arrestuan me rreth 1 kg kokainë në Tiranë, ku njëri prej tyre, Enea Sulejmani (ish-kreu i transportit ndërqytetas) u plagos nga efektivët, pasi rrezikoi jetën e tyre në tentativë për t’u larguar.

Mësohet se Shkurta në aksionin e mbrëmjes së të enjtes ku antidroga e Tiranës arrestoi 3 të rinjtë, ishte afër vendit të ngjarjes dhe sapo ka parë që kolegët e tij nisën aksionin, ka njoftuar grupin tjetër kriminal që prisnin për të marrë kokainën që të largohen.

Pas zbërthimit të celularëve të personave të arrestuar ka dalë emri i efektivit të Forcave Operacionale. Mes të arrestuarve janë gjetur biseda me një person tjetër me emrin “Visi i Pazarit”.

Sipas po të njëjtave burime, “Visi i Pazarit” përmes një numri anglez komunikonte me personat që u arrestuan për mallin dhe shumat e lekëve.

Vijojnë kontrollet për gjetjen e celularit me numër anglez të Ervis Shkurtës.

LEXONI GJITHASHTU:

• Arrestohet inspektori i Policisë, lidhje me 3 të arrestuarit që u kapën me kokainë
• EMRAT| Trafiku i kokainës në Tiranë, 2 personat e tjerë të arrestuar krah Sulejmanit