“Nuk e heq unë dot Berishën”, Mediu thirrje partive aleate: Të ndalojmë sulmet

Kryetari i Partisë Republikane Fatmir Mediu ishte këtë të martë i ftuar në një intervistë për Euronews Albania ku tha se Partia Republikane, njësoj siç ka qenë për 33 vite me radhë e shikon veten në bashkëpunim me Partinë Demokratike si në opozitë edhe në qeveri.

Ai tha se koalicione të tjera nuk mund të ketë.

“Partia republikane është aty ku ka qenë për 33 vite. Partia republikane dhe Partia Demokratike janë dy enë komunikuese, ne nuk kemi pasur koalicione më vete”,-tha Mediu.

I pyetur nëse opozita e ka luksin të “shpërdorojë” emra të rëndësishëm të opozitës, Mediu tha se çdo emër është i rëndësishëm për kontributin që ka dhe këto kontribute tyre duhet të vinë në mënyrë të qartë për të sjellë në jetën politike parlamentare, njerëz me kualitet tjetër që të ndryshojnë qasjen e politikës.

“Nuk mendoj që e ka. Unë mendoj se ne duhet të luftojmë deri në momentin e fundit për të ndryshuar këtë situatë bashkë me zotin Dule, zotin Duka kemi folur edhe me zotin Shehi. Zoti Shehi ka idenë e tij për ndërtimin e një lloj koalicioni që mund të forcojë raportin e këtij koalicioni për të përkthyer votat në mandate duke marrë edhe atë pjesë që nuk qaset te Partia Demokratike apo te partitë në koalicion me PD. Kjo do ishte gjë pozitive.

Unë shqetësimin e kam se jemi në një situatë politike shumë të polarizuar, në një shoqëri shumë të varfër, në një shtet shumë manipulatoir dhe me një pamundësi të reformës zgjedhore dhe sherrit brenda shtëpisë, hajrin ia shikon komshiu.

Nëse nuk gjejmë raportin elektoral duhet të gjejmë raportin politik me njëri-tjetrin. Nuk e heq dot unë zotin Berisha, nuk e heq unë dot zotin Shehi apo zotin Duka ata kanë partitë e tyre, çështja është se kontributet e tyre duhet të vinë në mënyrë të qartë për të sjellë në jetën politike parlamentare, njerëz me kualitet tjetër që të ndryshojnë qasjen e politikës në raport me këtë vend”,-tha Mediu.

LEXONI GJITHASHTU:

• Mbahet në Bosnjë ceremonia mortore për 19 viktimat e përmbytjeve
• Përplasje për “balancuesin” në RMV, qeveria: Ligji i ri në ‘Venecia’!