Nuk është më i lehtë ‘Delta’, por shqiptarët kanë krijuar imunitet, thotë epidemiologu

Mjeku epidemiolog, Fabian Cenko e shpjegon numrin e vogël të vdekjeve nga COVID në Shqipëri në 2021 krahasuar me 1 vit më parë me faktin se shqiptarët sivjet janë shumë më të imunizuar.

I ftuar në ‘Mirëmëngjes’, në Euronews Albania epidemiologu tha se varianti i ri Delta është vërtetuar se është jo vetëm më i transmetueshëm, por edhe shkaktar i shumë sëmundjeve të tjera.

Sipas tij, fakti që njerëzit po e kalojnë më lehtë të këtë variant në Shqipëri nuk lidhet me të ashtuquajturën ‘butësi’ të variantit ‘Delta’, por me faktin që popullata shqiptare ka krijuar një imunitet shumë më të madh se një vit më parë

“Në gushtin e këtij viti numri i rasteve është deri në 7 herë më shumë se 1 vit më parë, ndërkohë që numri i vdekjeve është 2 herë më pak.

Sivjet kemi një variant që është jo vetëm më i transmetueshëm, por po rriten të dhënat që tregojnë se edhe virulenca dhe aftësia për të shkaktuar sëmundje është e lartë. Fakti që ka më pak fatalitete tregon se popullata është sot shumë më e imunizuar nga vaksina apo në mënyrë natyrale”, shpjegoi mjeku.

Ai bëri thirrje për kujdes të shtuar dhe respektim të masave edhe nga ata persona që janë vaksinuar, pasi mundësia për t’u infektuar dhe për të infektuar të tjerët është e madhe edhe tek personat e vaksinuar.

LEXONI GJITHASHTU:

• Numri rastet aktive me COVID-19 arrin mbi 12 mijë
• Çfarë dimë për ‘Mu’, variantin e ri të COVID nën mbikëqyrjen e OBSH?