Nuk i zgjati dorën kundërshtares ruse, skualifikohet atletja ukrainase

Lojtarja ukrainase e skermës, Olga Kharlan, është skualifikuar pasi nuk pranoi t’ia zgjaste dorën kundërshtares së vet ruse, Anna Smirnova, në Kampionatin Botëror të Skermës, në Milano, të enjten.

Kharlan, katër herë fituese e medaljes olimpike dhe kampione botërore, e fitoi ndeshjen individuale 15:7 dhe pastaj nuk i shtrëngoi duart me kundërshtaren e vet, por deshi ta përshëndesë atë me cakërrim të shpatave.

Smirnova mbeti në skenë për rreth gjysmë ore pas incidentit, duke biseduar me një numër zyrtarësh para se të largohej.

Atletët ukrainas në sportet e tjera – përfshirë tenistet Elina Svitolina dhe Marta Kostyuk – kanë refuzuar po ashtu t’i shtrëngojnë duart me kundërshtarët rusë dhe bjellorusë, pas pushtimit të Ukrainës nga Rusia.

Bjellorusia është përkrahëse e pushtimit të paprovokuar rus të Ukrainës.

LEXONI GJITHASHTU:

• Prigozhin fotografohet në territorin rus, në qytetin ku po mbahet samiti Rusi-Afrikë
• Aleanca e re Kore e Veriut-Rusi, Pheniani dhe Moska forcojnë lidhjet