Koalicioni i organizatave jofitimprurëse në Kosovë, Demokracia në Veprim (DnV), tha se gjatë raundit të dytë të zgjedhjeve lokale nuk janë respektuar masat kundër COVID-19.
Në pjesën e dytë të ditës, sipas DnV-së, kanë vërejtur mosrespektim të masave si nga stafi zgjedhor ashtu edhe nga votuesit.
Sipas masave në fuqi, votuesit duhet të mbajnë maska dhe të respektojnë distancën fizike gjatë procesit të votimit.
DnV-ja po ashtu tha se ka rënë përqindja e daljes së qytetarëve në zgjedhje, krahasuar me rundin e parë, që u mbajt më 17 tetor.
“Sipas raportimeve të vëzhguesve të Demokracisë në Veprim (DnV), pjesëmarrja e qytetarëve në votime deri në orën 15:00 është 23.6%, rreth 2% më e ulët se në rundin e parë të zgjedhjeve. Komunat me daljen më të madhe vazhdojnë të jenë Mamusha (45%), Juniku (41%) dhe Kllokoti (37%) kurse ndërsa dalja më e ulët deri në 15:00 është regjistruar në Komunën e Prizrenit (19%) dhe Dragashit (17%). Fushë Kosova, Obiliqi, Rahoveci, Vushtrria dhe Mamusha janë ndër komunat që krahasuar me daljen e votuesve në rundin e parë, kanë shënuar rënien më të madhe. Rritje domethënëse në trendin e votimit, krahasuar me rundin e parë, është shënuar në Junik, Podujevë dhe Shtime”, thuhet në njoftimin e DnV-së.
