Komisioni Qendror i Zgjedhjeve në Kosovë ka publikuar rezultatet e para nga numërimi i 93.02% të fletëvotimeve që janë hedhur në përfaqësitë diplomatike të Kosovës. Sipas faqes zyrtare të KQZ-së, deri tani janë numëruar 40 kuti nga 43 që janë gjithsej.

Nga rezultatet e numërimit, Lëvizja Vetëvendosje, në koalicion me Guxo dhe Alternativa, ka marrë 80.75% të votave. Pas saj renditen Partia Demokratike e Kosovës me 7.48%, Lidhja Demokratike e Kosovës me 7.45%, dhe Aleanca për Ardhmërinë e Kosovës me 1.93%.

Numërimi i votave ka filluar të mërkurën në Qendrën e Numërimit dhe Rezultateve në Prishtinë, për 30 përfaqësi diplomatike të Kosovës, me gjithsej 43 vendvotime. Ky proces i votimit u zhvillua më 8 shkurt 2025, ku morën pjesë 15,352 votues, ose 75.57% e numrit të regjistruar të votuesve.