OKB dhe vendet perëndimore kundërshtojnë planin e Izraelit për Gazën

Plani i Izraelit për të marrë plotësisht kontrollin e Gazës është kundërshtuar fuqishëm nga komuniteti ndërkombëtar, përfshirë OKB-në, vendet perëndimore dhe ato të Lindjes së Mesme.

Ato paralajmëruan se një veprim i tillë do të çonte vetëm në më shumë gjakderdhje dhe do të shtonte vuajtjet e civilëve palestinezë në këtë enklavë.

Kryeministri britanik Keir Starmer i bëri thirrje Izraelit të rishqyrtojë menjëherë këtë plan, duke theksuar se “ai është i gabuar dhe vetëm do të sjellë më shumë gjakderdhje”, pa ndihmuar në përfundimin e konfliktit apo lirimin e pengjeve.

Starmer shtoi se po punon për një plan paqeje që përfshin angazhimin e të dyja palëve, me mirëbesim në negociata, dhe se kjo perspektivë po zhduket para syve tanë.

Komisioneri i Lartë i OKB-së për të Drejtat e Njeriut, Volker Turk, tha se planet e Izraelit për pushtimin e plotë të Gazës duhet të ndalen menjëherë, pasi janë në kundërshtim me vendimin e Gjykatës Ndërkombëtare të Drejtësisë dhe do të shkaktojnë zhvendosje masive, vrasje, shkatërrim dhe vuajtje të mëdha.

Australia gjithashtu i bëri thirrje Izraelit të mos ndjekë këtë rrugë, duke theksuar se zhvendosja me forcë është shkelje e së drejtës ndërkombëtare dhe do të përkeqësojë “katastrofën humanitare” në Gaza.

Ministrja e Jashtme, Penny Wong, kërkoi armëpushim, kthimin e pengjeve dhe hyrjen e ndihmave pa pengesa.

Turqia e konsideroi vendimin e Izraelit si një fazë të re të politikës ekspansioniste dhe gjenocid, duke paralajmëruar se kjo do të rrisë paqëndrueshmërinë dhe do të thellojë krizën humanitare.

Ajo kërkoi ndalimin e planeve të luftës, pranimin e armëpushimit dhe nisjen e negociatave për një zgjidhje me dy shtete.

Të premten, kabineti i sigurisë së Izraelit miratoi planin e kryeministrit Benjamin Netanyahu, i cili parashikon një operacion ushtarak për të marrë kontrollin e qytetit të Gazës dhe për të zhvendosur me forcë gjysmën e popullsisë drejt jugut.

Netanyahu deklaroi se qëllimi kryesor i këtij plani është vendosja e kontrollit ushtarak mbi gjithë Rripin e Gazës.

Ndërkohë, ushtria izraelite kontrollon tashmë rreth 75 përqind të Gazës, ku mijëra palestinezë janë zhvendosur dhe qytetet e tyre janë shndërruar në rrënoja.

LEXONI GJITHASHTU:

• “Faza e parë përfundon më 7 tetor”, detaje nga plani izraelit për pushtimin e Gazas
• Lideri i opozitës izraelite e quan planin e pushtimit të Gazas një “katastrofë”