Optimizmi i shqiptarëve për anëtarësimin në BE, Feraj: Paradoks! Kur e do, nuk ndodh

Ish-këshilltari i Kryeministrit Albin Kurti, Hysamedin Feraj, është shprehur se sa më shumë ta dëshirosh anëtarësimin në BE, aq më pak ndodh.

Komentet Feraj i bëri në “Euronews Albania” ku komentoi gjetjet e “Barometrit”, i cili tregoi se 85 % e shqiptarëve kanë mendim pozitiv për BE-në.

Ai tha se kur Kroacia ishte ende pa anëtarësuar në BE, ishin rreth 50 % e popullsisë që e dëshironin hyrjen në union.

“Ka diçka që duket si paradoks. Ne e kemi dashur 92 % anëtarësimin në BE. Në Kroaci ka qenë diku te 50 %. Sa më shumë e do anëtarësimin, aq më pak ndodh. Ne jemi popull i vendosur në dëshirën, por jo në vullnetin e mirë.

Dëshira i përket fushës së determinuesit. Vullneti është i lirë dhe krijues. Pra kjo tregon se jemi të vendosur më shumë në dëshirës sesa në vullnetin. Arsyeja i ka vendosur rregullat e lojës, ajo është mjeshtri. Mund t’i bëjmë mjeshtrit vetëm ndonjë hile”, është shprehur Feraj.