Orban: Hungaria ndihmon SHBA-në të kuptojë më mirë situatën në Evropë dhe konfliktin në Ukrainë

Kryeministri hungarez Viktor Orbán tha sot se vendi i tij po i ndihmon Shtetet e Bashkuara të Amerikës të kuptojnë më mirë situatën në Evropën Qendrore dhe konfliktin në Ukrainë, me qëllim që të lehtësojnë një zgjidhje paqësore.

Duke komentuar vizitën e Sekretarit të Shtetit të SHBA-së, Marco Rubio, në Budapest, Orban vlerësoi se vizita ishte e dobishme për SHBA-në.

“Amerika është larg, Evropa Qendrore është e ndërlikuar, e vështirë për t’u kuptuar dhe perspektiva e luftës është krejtësisht e ndryshme nga ajo këtu. Unë përpiqem t’i ndihmoj ata, amerikanët, duke u përpjekur t’u jap një perspektivë të ndryshme, më të afërt, më të gjerë, më historike, më të thellë, në mënyrë që ata të mund të marrin vendime të mira në paqebërje”, tha Orban në një videomesazh në Facebook.

Sekretari i Shtetit i SHBA-së tha të hënën gjatë vizitës së tij në Budapest se marrëdhëniet midis Shteteve të Bashkuara të Amerikës dhe Hungarisë janë në një “fazë të artë” dhe bazohen në bashkëpunim të fortë, i cili nuk është vetëm retorik, por edhe konkret në fushat e ekonomisë dhe energjisë.

Ai kujtoi lidhjet e ngushta midis Orbán dhe Presidentit të SHBA-së Donald Trump dhe tha se Trump është i përkushtuar ndaj Hungarisë dhe suksesit të saj.

Rubio përsëriti qëndrimin e SHBA-së se një nga qëllimet kryesore është përfundimi i luftës në Ukrainë sa më shpejt të jetë e mundur, duke shtuar se Shtetet e Bashkuara kanë marrë iniciativën në zhvillimin e negociatave midis Rusisë dhe Ukrainës, ndërsa institucionet e tjera ndërkombëtare nuk kanë arritur të bëjnë përparim në këtë drejtim.