Osmani cakton datën e zgjedhjeve për asambletë në Zveçan dhe Leposaviç

Të premten, presidentja e Kosovës, Vjosa Osmani caktoi 25 dhjetorin si datë të zgjedhjeve të parakohshme për Kuvendin Komunal të Zveçanit dhe atë të Leposaviçit.

Ky vendim erdhi pas shpërndarjes së Kuvendeve Komunale në Zveçan dhe Leposaviç.  Presidentja ftoi subjektet politike për fushatë të qetë, pa tensione, duke respektuar Kodin Elektoral dhe rivalët politikë.

Në shenjë kundërshtimi lidhur me vendimin e Qeverisë së Kosovës për targat ilegale serbe, nga 5 nëntor serbët janë larguar nga institucionet e Kosovës në katër komunat në veri: Mitrovicë e Veriut, Leposaviç, Zubin Potok dhe Zveçan. Dorëheqje kanë dhënë edhe kryetarët e këtyre komunave.

Më 23 nëntor, kryediplomati evropian, Josep Borell deklaroi se Kosova dhe Serbia kanë arritur marrëveshje për masat që ndihmojnë në shmangie të tensioneve dhe për koncentrim të plotë në propozimin për normalizim të marrëdhënieve mes dy vendeve.

Borrell tha se Kosova do t’iu japë fund veprimeve të mëtejme të lidhura me riregjistrim të makinave, derisa Serbia nuk do të lëshojë më targa të makinave me emra të qyteteve të Kosovës.

LEXONI GJITHASHTU:

• Lirohen nga paraburgimi tre infermieret që dhunuan të moshuarën në Pejë
• Këto janë vendet më të bukura që mund t’i vizitoni gjatë Krishlindjeve
• 430 kg kokainë në laboratorin e Fierit, SPAK: Një shqiptar e porositi nga Kolumbia