Osmani dhe kryeministri bullgar bisedojnë për anëtarësimin e Kosovës në NATO

Aspiratat e Kosovës për anëtarësim në NATO ishin temë e takimit mes presidentes së Kosovës, Vjosa Osmani, dhe kryeministrit të Bullgarisë, Dimitar Glavchev.

Dy udhëheqësit u takuan të martën në Uashington, në margjina të Samitit të NATO-s.

Osmani tha se Bullgaria është mbështetëse e palëkundur e Kosovës, në përpjekjet e saj për anëtarësim në organizatat ndërkombëtare, thuhet në komunikatën e lëshuar nga Zyra e Presidentes.

Në një postim në Facebook, Glavchev tha se Osmani kërkoi mbështetje dhe ndihmë për anëtarësimin e Kosovës në aleancë dhe se ajo mori garanci prej tij se Bullgaria do të votojë “me të dyja duart” për Kosovën, kur ajo t’i plotësojë kushtet për anëtarësim.

Autoritetet në Kosovë kanë kërkuar anëtarësim të përshpejtuar në NATO, pas shpërthimit të luftës në Ukrainë, në shkurt të vitit 2022.

Por, marrë parasysh se në radhët e saj janë katër shtete që nuk e njohin Kosovën – Greqia, Spanja, Rumania dhe Sllovakia – dhe vendimi për zgjerimin duhet të merret në mënyrë unanime, ajo kërkesë nuk ka shkuar përpara.

Osmani ndodhet në Uashington me ftesë të sekretarit amerikan të Shtetit, Antony Blinken.

Ajo mori pjesë në aktivitetin e organizuar nga Departamenti amerikan i Shtetit për Gratë, Paqen dhe Sigurinë, i cili u mbajt në kuadër të Samitit të NATO-s, shkruan REL.

Samiti, që përkon me 75-vjetorin e themelimit të aleancës ushtarake, nisi më 9 korrik dhe do të mbyllet më 11 korrik.

LEXONI GJITHASHTU:

• Samiti i Uashingtonit, Biden mbron me forcë NATO-n: Ukraina do të mbizotërojë
• Takimi i NATO-s në Uashington, mes simbolizmit dhe sfidave jetike globale