Osmani takon Escobar-in: Të hiqen barrikadat në veri të Kosovës

Presidentja e Kosovës, Vjosa Osmani, priti në takim këtë të hënë, të dërguarin e posaçëm  të Shteteve të Bashkuara të Amerikës për Ballkanin Perëndimor, Gabriel Escobar.

Gjatë takimit, Osmani ka theksuar nevojën urgjente të heqjes së barrikadave në veri të vendit të vendosura nga strukturat ilegale të organizuara në banda kriminale dhe të dirigjuara nga presidenti serb, Aleksandër Vuçiç.

Ajo theksoi se sulmet ndaj institucioneve të Kosovës dhe atyre ndërkombëtare janë krime për të cilat autorët e këtyre sulmeve duhet të përballen urgjentisht me drejtësinë.

Kryetarja e shtetit ka nënvizuar se Kosova vazhdon të jetë palë konstruktive në procesin e dialogut, dhe se veprimet e Serbisë janë tentim për të minuar dialogun për njohje të ndërsjellë.

Ndër të tjera, u diskutua se si të avancohen edhe më tej raportet mes Republikës së Kosovës dhe SHBA-ve, dhe në veçanti kërkesën e Presidentes Osmani të bërë në qershor 2022 për fillimin e dialogut strategjik në mes dy shteteve, si dhe integrimin e Kosovës në strukturat euroatlantike.

LEXONI GJITHASHTU

• Njerëz të maskuar në pikat kufitare, ende e bllokuar lëvizja në Jarinjë e Bërnjak
• Vuçiç: Më 15 dhjetor, kërkesë KFOR-it për dërgimin e 1 mijë trupave serbe në Kosovë
• Vuçiç-ndërkombëtarëve: Kosova nuk po respekton asnjë marrëveshje