“Paga minimale 45 mijë lekë në 2025-ën”- Rama: Jemi të tretët në rajon

Kryeministri Edi Rama njoftoi ditën e hënë se paga minimale në fund të mandatit qeverisës në vitin 2025 do të jetë 45 mijë lekë të reja.

Përmes një postimi në facebook Rama shkruan se Shqipëria e nisi nga vendi i fundit për pagën minimale dhe sot është në vendin e tretë pas baraz me Maqedoninë e Veriut dhe duke lënë pas Kosovën dhe Bosnjën.

Kritikave se pse pga nuk është 70 apo 80 mijë lekë, Rama iu përgjigj se nuk janë dëshirat e qeverisë që e përcaktojnë, por produktiviteti ekonomik.

Kryeministri Edi Rama në facebook:

E kemi nisur nga vendi i fundit në rajon për nivelin e pagës minimale, ndërsa me rritjen e fundit ngjitemi në vendin e tretë baraz me Maqedoninë e Veriut, duke lënë pas Bosnjë-Hercegovinën dhe Kosovën.

Do të bëjmë edhe dy rritje të tjera për ta mbyllur këtë mandat me pagë minimale 45 mijë lek, nga 38 mijë që ishte objektivi ynë elektoral, por që s’merrte parasysh inflacionin e luftës së Putinit për të gjunjëzuar ekonomikisht mbarë Europën!

Ndërkohë kjo rritje përtej parashikimeve e pagës minimale imponon edhe rritjen e pagës mesatare për të riekuilibruar piramidën e pagave, çka do të bëhet njëkohësisht në muajin prill.

Disa komentojnë se paga minimale duhet të bëhet 70 apo 80 mijë lekë, por përllogaritja e pagës minimale bazohet në produktivitetin ekonomik dhe konkurueshmërinë, jo në dëshirat tona (asnjë vend i rajonit nuk e ka një minimum të tillë). Çdo rritje artificiale e saj sjell me shpejtësi pasoja destabilizuese për ekonominë, punësimin, financat e vendit.

LEXONI GJITHASHTU

• Paga mesatare shkon 66 000 lekë, INSTAT: Rrogat u rritën 11% deri në dhjetor
• “Asnjë taksë për ato deri në 50 mijë lekë”, Rama: Në 2025 paga minimale 45 mijë lekë
• Rama: Sipërmarrja duke shtrënguar dorën për pagat po rrezikon burimet njerëzore