Palestër 5 ditë para lindjes, 40-vjeçarja: Ngrija 90 kg kur isha 2-muajshe shtatzënë

Farije Huskovci, është në muajin e 9-të të shtatzënisë, madje për rreth 5 ditë pritet që të lindë fëmijën e saj të dytë.

Trajnerja e fitnesit nga palestra ka vite që stërvitet intensivisht dhe nuk e ka ndalur as në këtë periudhë, kur shumë gra kanë frikë edhe të lëvizin apo te ecin gjatë nga meraku e jo më të mendojnë që të bëjnë palestër.

Ajo tregoi në emisionin GoodMorning Albanians në Euronews Albania se nuk e ka lënë për asnjë moment gjatë shtatzënisë stërvitjen në palestër, madje kur ishte 2 muajshe shtatzënë ngrinte pesha deri në 90 kilogramë.

“Shtatzënia ka qenë shumë e mbarë, me shumë ushtrime. Kam 15 vite që merrem me ushtrime fizike, por ka të bëjë shumë edhe ana psikologjike. E mora vesh shpejt që isha shtatzënë, se nisi të më shtohej oreksi. Fëmija i parë është 1 vit e gjysmë, e kam marrë vesh pak më vonë dhe kam qenë në muajin e dytë të shtatzënisë kur kam thyer disa rekorde peshash, e kam pasur 80 kilogramë  e çova 90 kilogramë. muajt e parë duhet të ruhesh për shkak të rrezikut nga aborti, por ne që kemi më shumë bazë muskulare e kemi më të lehtë”, tregoi ajo.