PAMJE/ Kreu tre vjedhje brenda javës, arrestohet 33-vjeçari në Vlorë

Policia e Vlorës ka arrestuar një 33-vjeçar, i cili dyshohet se ka kryer tre vjedhje vetëm gjatë javës së fundit.

Ai akuzohet për vjedhjen e disa televizorëve, një laptopi dhe sendeve të tjera, në të paktën tre raste të dokumentuara nga policia.

Përveç provave materiale, policia ka mbledhur edhe pamje nga kamerat e sigurisë, të cilat kanë fiksuar momentet kur autori ka kryer vjedhjet.

Njoftimi i policisë 

“Vodhi 3 herë, pajisje elektronike dhe sende me vlerë, gjatë javës së fundit, identifikohet dhe vihet në pranga 33-vjeçari.

Specialistët për Hetimin e Krimeve të Komisariatit të Policisë Vlorë, pas marrjes së disa kallëzimeve për vjedhje në lagje të ndryshme të qytetit, organizuan menjëherë punën hetimore për zbardhjen e tyre.

Si rezultat i veprimeve të shpejta dhe të mirëkoordinuara, u bë i mundur identifikimi dhe ndalimi i shtetasit E. S., 33 vjeç, banues në Vlorë, i cili dyshohet si autor i 3 vjedhjeve:

• Më datë 29.05.2025, në lagjen “Osman Haxhiu”, ka vjedhur 2 televizorë me vlerë 100 000 lekë, në lokalin e shtetasit F. Xh.;
• Më datë 23.05.2025, në lagjen “Lirim”, ka vjedhur 2 televizorë, 3 laptopë dhe 2 celularë, në zyrën e shtetasit K. K.;
• Më datë 24.05.2025, në lagjen “28 Nëntori”, ka vjedhur nga një automjet, baterinë dhe disa pajisje polumbari, me vlerë rreth 30 000 lekë”, thuhet në njoftim.

Po ashtu policia thotë se vijon veprimet hetimore për të dokumentuar raste të tjera vjedhjesh të dyshuara të kryera nga ky shtetas ndërsa materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë.

LEXONI GJITHASHTU:

• Vendimi i qeverisë, policë vullnetarë për hetime dhe administrim të provave
• U ekstradua nga Dubai, Apeli i GJKKO lë në burg Florenc Çapjan