Papunësia zbret në nivelin 8.8%, Shqipëria përballet me mungesë fuqie punëtore

Viti 2024 shënoi një rënie të papunësisë, e cila arriti një nivel të ri prej 8.8%. Shkalla zyrtare e papunësisë u ul me 0.7 pikë përqindje në krahasim me të njejtën periudhë të një viti më parë, por është rritur krahasuar me tremujorin e tretë të po të njejtit vit.

Sipas shifrave të INSTAT, niveli i papunësisë për vitin 2024 vlerësohet më poshtë se vitet e tjera, por ajo që mbetet shqetësuese është niveli i papunësisë tek të rinjtë.

Shifrat zyrtare tregojnë se, për tremujorin e katërt të vitit 2024, shkalla e papunësisë për popullatën 15 vjeç dhe më lart është 8.8%, krahasuar me 9.5% në tremujorin e katërt të vitit 2023.

Shqipëria dhe Spanja janë në nivel të barabartë për sa i përket papunësisë dhe kryesojnë Europën për shkallën më të lartë të papunësisë tek të rinjtë e grupmoshës 15-29 vjeç.

Pas tyre renditen Greqia, Serbia, Suedia dhe Finlanda.

Nga ana tjetër, sektorë të shumtë janë duke vuajtur për shkak të mungesës së fuqisë punëtore. Të rinjtë shqiptarë preferojnë të emigrojnë në kërkim të mundësive më të mira ekonomike jashtë vendit.

Euronews ka siguruar të dhëna nga AKPA për numrin e shtetasve të huaj që kanë kërkuar të punojnë në Shqipëri.

Gjatë vitit 2024, janë aprovuar rreth 13,000 aplikime online për leje unike që mundësojnë qëndrimin për motive punësimi.

Shumica e shtetasve të huaj vijnë nga Italia, Turqia, Kosova, India dhe Filipinet.

Miratimet për punësim janë bërë për shtetas të huaj në këto sektorë ekonomikë: akomodim dhe shërbim ushqimor, aktivitete të tjera shërbimi, sektorin e ndërtimit, tregtinë me shumicë dhe pakicë, si dhe industrinë përpunuese.

LEXONI GJITHASHTU:

• Projekti i ri në hyrje të Shkodrës, IKMT vazhdon punën për prishjen e objekteve
• Hekurudha në Vlorë e degraduar prej vitesh, qytetarët: Të vihet në punë