Paradoksi me lejet e ndërtimit, popullsia po ulet, stoku vazhdon të rritet

Programi për Zhvillim i Kombeve të Bashkuara, UNDP ka publikuar një studim që nxjerr të dhëna paradoksale për sektorin e ndërtimit.

Gjetjet zbulojnë se nga viti 2017, po ndërtohen banesa e biznese, për të cilat nuk ka kërkesa për blerjen e tyre. Në Shqipëri kërkesat për blerje pronash, janë shumë më të ulëta se lejet e ndërtimit.

Kjo qasje del në një studim të realizuar nga Programi për Zhvillim i Kombeve të Bashkuara, i cili thotë se burimet e kërkesës së madhe për leje të reja ndërtimi janë të paqarta, ndërsa popullsia po zvogëlohet dhe një pjesë e konsiderueshme e banesave janë të lira.

Studimi vlerëson se në 8 vitet e fundit çmimet e pasurive të paluajtshme janë rritur me 102%, ku hovi i madh nisi pas vitit  2017.

Në ndërtimet e kryera, Tirana mban peshën kryesore me 62% të vëllimit ndjekur nga Durrësi me 7%. Po ashtu, sipas qëllimit të ndërtimit, 76% e njësive janë apartamente.

Një e dhënë kontradiktore në studim del edhe në raportin e rritjes së popullsisë në kryeqytet me volumin e ndërtimit.

Në dekadën e fundit popullsia është rritur 4% ndërsa stoku i banesave 27%.

Edhe në raport me rajonin dhe BE-në, sektori i ndërtimit në Shqipëri duket që po zhvillohet me shpejtësi të shumëfishtë, edhe pse nuk jep një përgjigje me logjikë ekonomike sa i përket ofertë-kërkesës.

LEXONI GJITHASHTU:

• Sulmi kibernetik, Banka Credins: Llogaritë dhe asetet bankare janë të sigurta
• Ngjela paralajmëron Ramën: Çfarë do t’i ndodhë nëse bashkëpunon me Berishën
• Teatri i Mariupolit u shkatërrua për të fshehur krimet ruse, thotë zyrtari ukrainas