Paralajmërimi i NATO-s për Veriun, reagon Berisha

Kreu i Partisë Demokratike Sali Berisha ka përshëndetur vendimin e NATO-s për të ndërhyrë nëse situata në Veri përshkallëzohet.

Përmes një postimi në Facebook, Berisha shprehet se qëndrimi i NATO-s është haptazi një paralajmërim për Vuçiç ‘që të mos luajë me zjarrin’.

Sipas Berishës, Vuçiç i urdhëroi dje serbët në Kosovë që të braktisin institucionet shtetërore të vendit, ndaj ai e ka vendin në Hagë si një rrezik serioz e i pakorrigjueshëm për paqen dhe stabilitetin në rajon.

“Partia Demokratike mbështet plotësisht dhe përshëndet qëndrimin e NATO-s si dhe dënon me ashpërsinë më të madhe përpjekjet e ‘Putinit të vogël’ për të ndezur konflikt të ri në rajon. Ajo paralajmëron serbo-madhin Vuçiç se ëndrrat e tij të ‘Serbisë së Madhe’ janë varrosur njëherë e përgjithmonë në Kosovë dhe se ndaj çdo akti agresioni të tij, shqiptarët do të reagojnë si komb i vetëm”, shkruan mes të tjerash Berisha.

Zëvendëssekretari i Përgjithshëm i NATO-s, Mircea Geoana, tha të shtunën se misioni i NATO-s në Kosovë, KFOR, mbetet vigjilent dhe i gatshëm për të ndërhyrë në rast se rrezikohet stabiliteti.

LEXONI GJITHASHTU:

• Dorëhiqen kryetarët e komunave veriore të Kosovës
• Zyrtari i NATO-s: KFOR i gatshëm të ndërhyjë nëse rrezikohet stabiliteti