Parandalohet futja e 1 droni në burgun e Burrelit, dyshohet se merrte pamje filmike

Drejtoria e Përgjithshme e Burgjeve ka bërë të ditur se është parandaluar futja e një droni në burgun e Burrelit.

Përmes një njoftimi, Drejtoria e Burgjeve shkruan se droni nuk përmbante sende të ndaluara, por sipas tyre, hetimet tregojnë se ka një tendencë të grupeve kriminale për të marrë pamje nga brenda bugjeve.

Ndërkohë në bashkëpunim me Prokurorinë e Policinë po punohet për dokumentimin e plotë të ngjarjes dhe arrestimin e personave përgjegjës.

Deklaratë për Shtyp:

Sistemi i burgjeve shqiptare, në bashkëpunim të ngushtë me organet ligjzbatuese, ka treguar edhe një herë gadishmërinë dhe efikasitetin e tij të plotë në parandalimin e veprimtarive të paligjshme të grupeve të strukturuara kriminale. Përpjekjet e fundit për përdorimin e mjeteve fluturuese për qëllime të paligjshme janë neutralizuar në kohë reale.

Inteligjenca operative e sistemit ka administruar të dhëna të besueshme mbi planet e një grupi kriminal për të futur sende të ndaluara në Institucionin e Ekzekutimit të Vendimeve Penale Burrel. Në përgjigje të kësaj, janë ndërmarrë masa të menjëhershme, duke përdorur teknologji digjitale të avancuar, për të parandaluar çdo përpjekje për realizimin e qëllimeve të tyre kriminale.

Droni i kapur nuk përmbante sende të ndaluara, por hetimet tregojnë një tendencë të grupeve kriminale për të marrë pamje nga brenda burgjeve të sigurisë së lartë, me qëllim mbledhjen e informacioneve për veprimtari të mëtejshme të paligjshme.

Aktualisht, pajisja fluturuese do t’i nënshtrohet ekspertimit daktiloskopik me qëllim identifikimin e gjurmëve papilare, dhe më pas ekspertimit kompjuterik për të identifikuar numrin IMEI dhe çdo informacion të administruar nga kjo pajisje. Po kryhen veprimet e para procedurale, dhe materialet përkatëse do të referohen në prokurorinë respektive.

Në bashkëpunim të ngushtë me prokurorinë, Policinë e Shtetit dhe strukturat e tjera inteligjente, po punohet intensivisht për dokumentimin e plotë të ngjarjes dhe arrestimin e bashkëpunëtorëve jashtë regjimit të burgut.

Sistemi i burgjeve shqiptare mbetet i vendosur në ruajtjen e rendit dhe sigurisë së institucioneve të tij, duke përmirësuar vazhdimisht masat mbrojtëse dhe teknologjinë për të përballuar çdo kërcënim të mundshëm.

LEXONI GJITHASHTU:

• Pamjet brenda stanit ku i riu vrau të atin dhe e hodhi në pus, detaje nga krimi
• Prokuroria në Kosovë ngre aktakuzë ndaj një të dyshuari për krime lufte