Parandalohet vrasja në Vlorë, policia arreston 39-vjeçarin pas konfliktit

Këtë të enjte në Vlorë, policia ka arrestuar një 39-vjeçar, i cili dyshohet se po tentonte të kryente një akt kriminal pas një konflikti për motive të dobëta me një shtetas tjetër.

Sipas njoftimit zyrtar, shërbimet e Policisë kanë ndërhyrë menjëherë pas marrjes së informacionit për një konflikt të ndodhur në ambientet e një lokali në lagjen “Uji i Ftohtë”, në qytetin e Vlorës, duke parandaluar përshkallëzimin e situatës.

Gjatë ndërhyrjes, efektivët kanë bërë të mundur kapjen në flagrancë të shtetasit me iniciale A. Sh., 39 vjeç, banues në Vlorë. Sipas Policisë, në momentin që ka konstatuar praninë e uniformave blu, ai ka tentuar të fshehë në një lulishte një armë zjarri pistoletë që e mbante me vete.

Nga hetimet paraprake rezulton se 39-vjeçari ishte konfliktuar me shtetasin B. J., 30 vjeç, gjithashtu banues në Vlorë, për motive të dobëta, brenda ambienteve të lokalit.

Arma e zjarrit pistoletë, së bashku me krehërin me fishekë, është sekuestruar në cilësinë e provës materiale, ndërsa ndaj të dyshuarit rëndon akuza për armëmbajtje pa leje.

Materialet procedurale i janë referuar Prokurorisë për veprime të mëtejshme.