Parashutistët e juntës bombardojnë civilët, 24 të vdekur dhe 47 të plagosur

Një sulm me parashutë me motor gjatë një festivali dhe proteste në Mianmarin qendror ka vrarë të paktën 24 persona dhe ka plagosur 47 të tjerë, tha për BBC Burmese një zëdhënës i Qeverisë së Unitetit Kombëtar në mërgim.

Rreth 100 persona ishin mbledhur në qytezën Chaung U të hënën në mbrëmje për festivalin Thadingyut – një festë kombëtare me rrënjë budiste – kur një parashutë me motor hodhi dy bomba mbi turmë, sipas një zyrtari lokal të Forcës së Mbrojtjes Popullore anti-junta.

Eventi ishte gjithashtu një vigjilje me qirinj kundër politikave të juntës.

Mianmari ka qenë në luftë civile që prej vitit 2021, kur ushtria mori pushtetin në një grusht shteti. OKB-ja vlerëson se konflikti ka vrarë më shumë se 5,000 civilë.

Zyrtari i Forcës së Mbrojtjes Popullore tha për BBC Burmese se gjatë tubimit të së hënës kishin marrë informacion për një sulm të mundshëm ajror dhe u përpoqën ta përfundonin shpejt protestën, por paramotorët arritën më herët sesa pritej.

“Ata mbërritën dhe hodhën bombat brenda vetëm shtatë minutash,” tha ai.
“Kur ra bomba e parë, rashë në tokë, por më goditi në pjesën e poshtme të gjurit. Kishte njerëz të vrarë pranë meje.”

Vendasit i thanë BBC Burmese se dëmet e shkaktuara nga shpërthimet e së hënës e bënë të vështirë identifikimin e trupave të pajetë.

“Fëmijët u bënë copë-copë,” tha për AFP një grua që kishte ndihmuar në organizimin e eventit.

Ajo nuk ishte në vendngjarje, por mori pjesë në funeralet e së martës dhe shtoi se ende po “mbledhin pjesë trupash nga toka”.

Në një deklaratë të martën, Amnesty International tha se përdorimi i parashutistëve të motorizuar nga junta për të sulmuar komunitetet ishte pjesë e një “trendi shqetësues” në zonë.

BBC Burmese raportoi se junta po përdor gjithnjë e më shumë parashuta me motor për shkak të mungesës së avionëve dhe helikopterëve – një situatë e përkeqësuar nga sanksionet ndërkombëtare që e kanë bërë më të vështirë sigurimin e pajisjeve ushtarake.

Joe Freeman, studiues në Amnesty International për Mianmarin, tha se sulmi “duhet të shërbejë si një thirrje e tmerrshme zgjimi se civilët në Mianmar kanë nevojë për mbrojtje urgjente”.

Ai gjithashtu i bëri thirrje ASEAN-it, bllokut rajonal të Azisë Juglindore, që pritet të mblidhet më vonë këtë muaj, që të “rrisë presionin mbi juntën dhe të rishikojë një qasje që i ka dështuar popullit të Mianmarit për gati pesë vjet”.

Gjatë vigjiljes me qirinj, protestuesit kundërshtuan rekrutimin ushtarak të detyruar nga junta dhe zgjedhjet e ardhshme, ndërsa bënë thirrje për lirimin e Aung San Suu Kyi dhe të të burgosurve politikë.

Mianmari pritet të zhvillojë zgjedhjet e përgjithshme në dhjetor – votimet e para që prej grushtit të shtetit në vitin 2021. Megjithatë, kritikët thonë se këto zgjedhje nuk do të jenë as të lira, as të ndershme, por do t’i japin juntës një mjet për të vazhduar ushtrimin e pushtetit të pakontrolluar.