Parker flet për Armando Brojën: Jemi në bisedime, por ende nuk ka asgjë konkrete

Armando Broja është aktualisht në bisedime me Burnleyn, skuadrën që siguroi ngjitjen në Premier League, por deri tani nuk ka asnjë marrëveshje konkrete.

Këtë fakt e ka konfirmuar trajneri i Burnley-t, Scott Parker, i cili ka folur për sulmuesin shqiptar dhe ka kërkuar më shumë kohë për të vendosur.

“Po e shqyrtojmë këtë mundësi, por nuk ka asgjë shumë afër. Pra, nuk do të kemi lajme deri sa të dalë diçka konkrete, ose të jemi shumë afër marrëveshjes. Megjithatë, po punojmë për të forcuar disa pozita dhe, si në çdo afat kalimtar, duhet të marrim edhe lojtarët e duhur. Shpresojmë që gjatë javëve të ardhshme të arrijmë të sjellim disa lojtarë të rinj, duke kompensuar edhe ata që kemi humbur. Po bëjmë maksimumin për ta arritur këtë”, tha Parker.

Armando Broja, i cili nuk ka luajtur prej një kohe të gjatë, ka kaluar një periudhë të vështirë te Chelsea dhe është vendosur në treg për një transferim për një vlerë prej 30 milionë eurosh, ndonëse mund të largohet edhe për më pak.

Lojtari shqiptar kishte tentuar të kalonte në huazim te Fulham dhe Everton, por pa arritur të lërë gjurmë.

Së fundmi është raportuar se Burnley ka shprehur interes serioz për transferimin e tij, por gjithçka do të vendoset në ditët në vijim.

LEXONI GJITHASHTU:

• Broja largohet pas 16 vitesh te Chelsea, zbulohet ekipi ku mund të shkojë
• Armando Broja drejt Bundesligës, kush janë dy klubet që e duan menjëherë shqiptarin