Parlamenti miraton Komisionin Hetimor për Inceneratorët

Mazhoranca dhe opozita kanë rënë dakord për të ngritur komisionin hetimor për hetimin e inceneratorëve.

Pas mosmarrëveshjeve për objektin e hetimit, palët kanë gjetur konsensus dhe Parlamenti miratoi me 117 vota pro, asnjë kundër dhe vetëm një abstenim ngritjen e këtij komisioni.

Komisioni Hetimor do të kontrollojë zbatimin e ligjeve për procedurat e ndërtimit të tyre, pasojat ekonomike në buxhet dhe efektet anësore në konkurrencën e lirë.

Gjatë punimeve pritet të vlerësohet nevoja për përafrimin e legjislacionit për koncensionet dhe mjedisor, me direktivat dhe praktikat më të mira të BE-së.

“Ky hetim do të synojë nxjerrjen e përgjegjësive institucionale, garantimin e transparencës, mbrojtjen e konkurrencës dhe tregut të lirë, dhe garantimin e të drejtës së qytetarëve për një mjedis të pastër”, thuhet në relacion.

Në përfundim, Komisioni Hetimor bashkë me raportin përfundimtar i paraqet Kuvendit në seancë plenare rekomandime në lidhje me nxjerrjen e përgjegjësive institucionale, miratime, ndryshime apo korrigjime të kuadrit ligjor dhe sipas rastit, njoftimin e prokurorisë për fillimin e çështjes penale.