Pas 3 vitesh pritjeje, Putin dikton lojën – Zelensky në pozitë të vështirë

Për tre vjet, ai ishte në qendër të vëmendjes, por tashmë është e paqartë nëse është ende në dhomën e duhur.

Presidenti i Ukrainës, Volodymyr Zelensky, ka qenë simboli i qëndrimit të bashkuar të Perëndimit kundër një Rusie autokratike dhe agresive.

Një figurë që u krahasua me Çërçillin, duke detyruar Evropën të merrte një qëndrim moral përballë një Kremlini që për vite kishte punuar për të ndarë dhe korruptuar Perëndimin.

Megjithatë, Zelensky u shfaq i zbehur gjatë daljes së tij publike të mërkurën në Kiev, përkrah Sekretarit të Thesarit të SHBA-së, Scott Bessent.

Presidenti ukrainas kishte shpresuar të takohej personalisht me Presidentin amerikan Donald Trump për të diskutuar një vizion të gjerë për paqen, pas sinjalizimeve të Trump se një takim mes tyre ishte i mundshëm.

Megjithatë, në vend të kësaj, ai u përball me një delegacion financiar të kryesuar nga miliarderi amerikan Bessent, me një marrëveshje ekonomike që Zelensky nuk e nënshkroi.

Ndërkohë, lajmet konfirmuan se Trump ishte i angazhuar gjetkë: në një tjetër bisedë telefonike me Presidentin rus, Vladimir Putin, biseda e dytë mes tyre brenda pak ditësh.

Telefonata e fundit midis Trump dhe Putin u pasua nga lirimi i papritur i të burgosurit amerikan Marc Fogel nga Rusia, duke krijuar një moment të përsosur televiziv për Trump.

Një sinjal për opinionin amerikan se Moska mund të jetë një partner me të cilin mund të bëhen marrëveshje të favorshme.

Për Zelenskyn, këto dy ditë kanë qenë të mbushura me pasiguri dhe zhgënjim. Në një kohë kur liderët evropianë udhëtonin me orë të tëra për t’u shfaqur pranë tij në Kiev, tani ai është bërë një prioritet dytësor në axhendën e Trump, pas një njeriu që është i akuzuar për krime lufte nga Gjykata Penale Ndërkombëtare.

Nuk dihet me saktësi përmbajtja e diskutimeve mes Trump dhe Putin, por Kremlini ka pritur këtë moment për tre vjet – një mundësi për të shfrytëzuar lodhjen e Perëndimit dhe për të ndarë NATO-n.

Ndërkohë, në SHBA, Sekretari i ri i Mbrojtjes, Peter Hegseth, hodhi poshtë disa nga kërkesat kryesore të Zelenskyt për një marrëveshje paqeje: Ukraina nuk do të bëhet pjesë e NATO-s, nuk do të rikthehet në kufijtë e saj të vitit 2014, dhe çdo forcë paqeruajtëse do të përbëhet nga trupa evropiane ose jo-amerikane.

Për Zelenskyn, ky ishte një goditje e rëndë, pasi ai kishte deklaruar vazhdimisht se garancitë e sigurisë pa SHBA-në do të ishin “të pavlera”.

Këto zhvillime duket se përputhen me një plan paqeje të sugjeruar më herët nga gjenerali në pension Keith Kellogg, i cili tani është i dërguari presidencial për Ukrainën dhe Rusinë. Sipas këtij plani, Ukraina duhet të heqë dorë nga NATO, të pranojë një armëpushim dhe ndihmat e saj financiare të shndërrohen në kredi të cilat do të duhet t’i shlyejë.

Elementë të këtij plani mund të jenë pjesë e ofertës që Bessent i paraqiti Zelenskyt në Kiev.

Në këtë kontekst, trajtimi i Ukrainës si një çështje e dytësore në politikën e jashtme të Trump është më se i qartë.

Presidenti amerikan është i fokusuar tek marrëdhënia me Putinin, ndërkohë që Zelensky dhe Ukraina mbeten në pritje të vendimeve të fuqive të mëdha.

Në fund të fundit, SHBA nuk është teknikisht në luftë me Rusinë, por duket se është në rrugën për të përcaktuar termat e paqes në Ukrainë.

LEXONI GJITHASHTU:

• Trump kundër Zelenskyt: Cili është plani i tij për luftën në Ukrainë
• Trump për Zelenskyn: Një komedian bindi SHBA të shpenzonte 350 mld për një luftë…