Pas kritikave nga BE për takimet me Putin, Orban zhvillon bisedime me liderin kinez

Kryeministri hungarez Viktor Orban u takua me liderin kinez Xi Jinping në Pekin të hënën.

Kjo disa ditë pas një vizite të shumë përfolur në Moskë dhe një tjetër në Kiev , të cilat lideri europian i ekstremit të djathtë i përshkroi si një “mision paqeje”.

Orban, i cili është kritikuar gjerësisht në Perëndim për pozicionimin e tij miqësor ndaj Rusisë , postoi një foto të mbërritjes së tij në një aeroport të Pekinit me mbishkrimin “Misioni i Paqes 3.0” në platformën e mediave sociale X.

Bisedimet midis dy liderëve në Pekin u fokusuan në “komunikim të thellë” mbi luftën në Ukrainë, sipas një artikulli të botuar nga transmetuesi shtetëror kinez CCTV.

Vizita e paparalajmëruar më parë e Orban vjen një ditë përpara fillimit të samitit të NATO-s në Uashington, ku presidenti i SHBA Joe Biden do të presë liderët nga blloku, i cili përfshin Hungarinë, dhe do të mbledhë mbështetje të vazhdueshme për mbrojtjen e Ukrainës.

Kina, aleati më i rëndësishëm diplomatik i Rusisë, pritet të jetë gjithashtu në axhendën e atij takimi.

Udhëheqësit e NATO-s janë bërë gjithnjë e më të alarmuar për atë që ata thonë se është mbështetja e Kinës përmes ofrimit të mallrave dhe mbështetjes ekonomike dhe diplomatike për Moskën.

Pekini  nga ana tjetër ka thënë se nuk ka ofruar armë për asnjërën palë të konfliktit dhe ka mbrojtur atë që i quan kontrollet e tij të rrepta mbi eksportet me përdorim të dyfishtë.

Kina pretendon neutralitet në luftë dhe gjithashtu ka kërkuar të vendoset si një ndërmjetës i mundshëm i paqes në konflikt, edhe pse Xi ka thelluar besnikërinë e tij me presidentin rus Vladimir Putin në më shumë se dy vjet që nga pushtimi i Ukrainës nga Moska.

LEXONI GJITHASHTU:

• Aleatët e Viktor Orbanit vendosin fasha në veshë në shenjë solidariteti me Trumpin
• Hakmarrje ndaj Orban, ministrat e jashtëm të BE do të sabotojnë samitin në Hungari