Pas mbylljes së shkollave, vajzat afgane u kthehen medreseve

Një grup i vajzave me mbulesa të zeza në fytyrë, hyjnë me qetësi në medresenë në Gor, provincën qendrore të Afganistanit.

Brenda këtij institucioni arsimor islam, dhjetëra adoleshente ulen në tokë dhe recitojnë Kuranin, librin e shenjtë islam.

Në mesin e tyre është edhe Zora Jalali, e cila ishte në vitin e fundit të shkollës kur talibanët morën pushtetin më 2021. Grupi militant më pas ua ndaloi vajzave që të ndiqnin mësimin përtej klasës së gjashtë, dhe me këtë vendim Zora Jalalit iu shua ëndrra që të bëhej mjeke.

Jalili tani është në mesin e mijëra adoleshenteve që janë regjistruar në medresetë e udhëhequra nga talibanët, duke i parë ato si mundësinë e fundit për të vazhduar edukimin e tyre. Militantët kanë lejuar vajzat e të gjitha moshave të studiojnë në medrese në Afganistan, shtet me shumicë myslimane dhe me një popullsi prej rreth 40 milionë banorësh.

“Duam që shkollat e rregullta të rihapen”, thotë një 18-vjeçare për Radion Azadi të Radios Evropa e Lirë. “Përveç edukimit fetar, ne po ashtu duam të mësojmë lëndë të tjera”.

Talibanët janë zotuar se nuk do tí largojnë të gjitha format e edukimit modern sekular, që lulëzuan në Afganistan pas pushtimit të vitit 2001 të udhëhequr nga Shtetet e Bashkuara, që rrëzuan nga pushteti regjimin e parë të talibanëve.

Që kur kanë rimarrë pushtetin, militantët kanë shndërruar dhjetëra shkolla sekulare, universitete publike dhe qendra të tjera trajnuese në medrese (seminare islamike), duke nxitur rritjen e numrit të medreseve në shtet.

Militantët po ashtu janë zotuar se do të rishikojnë kurrikulën kombëtare dhe do të ndërtojnë një rrjet të madh të medreseve në të 34 provincat e shtetit.

LEXONI GJITHASHTU:

• 32 njerëz humbën jetën në punë në 2022, kush rrezikon më shumë?
• Schmidt ndryshon Kushtetutën për të mundësuar formimin e qeverisë në Bosnje