Pas pushtimit të Lisiçanskut, trupat ruse përqëndrohen tek provinca e Donjeckut

Forcat ruse po përpiqen të depërtojnë më thellë në lindje të Ukrainës dhe të marrin tërë rajonin e Donjeckut, pas marrjes së Luhanskut.

Ministri rus i Mbrojtjes, Sergei Shoigu u takua të hënën me presidentin Putin, të cilit i raportoi se trupat ruse kishin marrë nën kontroll Luhanskun, që së bashku me provincën fqinje të Donjeckut përbëjnë zonën industriale të Donbasit.

Nga ana e tij, Putin i kërkoi ministrit vijimin e ofensivës.

“Njësitë ushtarake, përfshirë ato në Lindje dhe ato në Perëndim duhet të kryejnë detyrën sipas planit të paracaktuar. Shpresoj që gjërat të shkojnë në të njëjtin drejtim që shkuan deri tani në Luhansk”, tha Putin.

Ditën e hënë, guvernatori i Luhanskut deklaroi se ishte marrë vendimi për tërheqjen e trupave ukrainase, për të shmangur një “Mariupol të dytë”. Zyrtari tha se, trupat ukrainase janë gati të përballen me bombardimet dhe artilieritë sesa të përfshihen në një betejë me shumë fronte.

“Rusët nuk do ta marrin Donjeckun shumë shpejt, pasi rajoni i Luhanskut është vija e frontit dhe barrikadat në Donjeck u forcuan dhe fortifikuan, ndaj nuk do të jetë e lehtë të kalosh përmes tyre”, u shpreh Guvernatori i Luhanskut, Serhiy Haidai.

Rusia mori nën kontroll Lisiçanskun ditën e dielë. Ushtria vendase konfirmoi se forcat e saj ishin tërhequr nga qyteti, që ishte mburoja e fundit e rezistencës ukrainase në provincën e Luhanskut.

LEXONI GJITHASHTU

• Refugjatët ukrainas nuk gjejnë shtëpi në Belgjikë, kthehen në vendlindje
• Putin urdhëron vazhdimin e luftës në Ukrainë pas pushtimit të Lysychansk