Pas sulmit kibernetik, Bashkia e Tiranës shtyn regjistrimin në çerdhe dhe kopshte

Bashkia e Tiranës ka shtyrë afatin e regjistrimit në çerdhe dhe kopshte publike deri më 30 qershor pas sulmit kibernetik që nxori jashtë funksionit platformën e aplikimit online.

Përmes një njoftimi në rrjetet sociale bashkia sqaron prindërit se në datat 25, 26, 27 dhe 30 qershor 2025 mund të paraqiten në Drejtorinë e Përgjithshme të Çerdheve dhe Kopshteve (Adresa: Rruga “Barrikadave”) për të kryer aplikimet për regjistrimin e fëmijëve.

“Për shkak të sulmit kibernetik ndaj Bashkisë Tiranë më datë 20 qershor 2025 Platforma e Aplikimeve për Regjistrimin e Fëmijëve në Çerdhet dhe Kopshtet Publike e- femijet.tirana.al nuk eshte ende në funksion.
Për sa më lart, ju informojmë se ne datat 25, 26, 27 dhe 30 Qershor 2025 mund te paraqiteni në Drejtorinë e Përgjithshme të Çerdheve dhe Kopshteve (Adresa: Rruga “Barrikadave”) për të kryer aplikimet për regjistrimin e fëmijëve në çerdhe, kopshte dhe kalimet nga çerdhja në kopsht për të gjithë ju që nuk arritët të aplikonit në platformë në datat 02-20 qershor 2025”, thuhet në njoftimin e bashkisë.