Pas Tiranës, KAS vendos rinumërim të të gjitha kutive në një tjetër qark

Komisioni i Ankimimeve dhe Sanksioneve ka miratuar këtë të hënë kërkesën për hapjen e të gjitha kutive të votimit në qarkun e Fierit, duke urdhëruar rinumërimin e 587 Qendrave të Votimit. Vendimi u mor me votat e dy anëtarëve të KAS, Ledio Braho dhe Elvis Cefa.

Kjo është hera e dytë që KAS vendos për një rinumërim të plotë në nivel qarku, pas atij të vendosur më herët për qarkun e Tiranës.

Kërkesa për rinumërimin e kutive në Fier u paraqit nga koalicioni “Nisma Shqipëria Bëhet”, dhe u mbështet edhe nga koalicioni opozitar “Partia Demokratike – Aleanca për Shqipërinë e Mirë (PD-ASHM)”.

Rinumërimi pritet të nisë në ditët në vijim në ambientet e përcaktuara nga Komisioni Qendror i Zgjedhjeve dhe do të mbikëqyret nga përfaqësues të partive politike.

Ky zhvillim vjen mes pretendimeve të opozitës për parregullsi në procesin e numërimit dhe rezultatin final të zgjedhjeve të 2025.

Rinumërim i pjesshëm do të kryehet dhe në Dibër, ku do të numërohen votat e kandidatëve të Partisë Demokratike. Kërkesa në Dibër u bë nga kandidati i PD-së Xhemal Gjunkshi, i cili kërkoi verifikimin e votave preferenciale të kandidatëve brenda listës së Partisë Demokratike.

LEXONI GJITHASHTU:

• KAS merr vendimin: Qarku i Tiranës shkon në rinumërim, 1282 kuti votimi do të hapen
• PD kërkoi shpalljen e pavlefshme të zgjedhjeve në Kukës, KAS merr vendimin