Partia Demokratike ka denoncuar këtë të enjte Partinë Socialiste për shkelje të Kodit Zgjedhor në qytetin e Delvinës. Sipas selisë blu, PS ka hapur një zyrë elektorale vetëm 50 metra larg Komisionit të Zonës së Administrimit Zgjedhor (KZAZ), ndonëse ligji kërkon një distancë minimale prej 300 metrash nga KZAZ dhe qendrat e votimit.
Denoncimi fillimisht u bë nga kandidatja e PD-së në qarkun e Vlorës, Ina Zhupa, ndërkohë që më vonë, Koalicioni “PD-Shqipëria për Aleancën Madhështore” depozitoi në KQZ një kërkesë për mbylljen e kësaj zyre elektorale.
“Kjo kërkesë ka të bëjë me konstatimin e shkeljes së rregullave të parashikuara nga legjislacioni në fuqi për zgjedhjet nga subjekti zgjedhor, Partia Socialiste. Konkretisht, kemi konstatuar se në qytetin e Delvinës është hapur një zyrë zgjedhore e PS-së në një distancë shumë të afërt me KZAZ-në e Delvinës, e cila ndodhet te kinoteatri i qytetit, aty ku janë parashikuar edhe qendrat e votimit për zgjedhjet e 11 majit.
Sipas informacioneve nga terreni, kjo zyrë përdoret nga kandidatët e listës shumëemërore të PS-së, Ardit Bido dhe Ina Malko. Bashkëlidhur janë edhe pamjet e denoncimit në fjalë.
Hapja e një zyre zgjedhore në një distancë nën 300 metra nga qendrat e votimit apo KZAZ ndalohet nga kuadri ligjor në fuqi, për të shmangur ndikimin te zgjedhësit. Në këto kushte, ne si subjekt zgjedhor, Koalicioni Partia Demokratike-Aleanca për Shqipërinë Madhështore, i drejtohemi KQZ-së që të konstatojë këtë shkelje dhe të marrë urgjentisht masat e duhura administrative dhe ligjore për mbylljen e menjëhershme”, thuhet në kërkesë.
Menjëherë pas publikimit të kësaj kërkese ka reaguar edhe kandidati i Partisë Socialiste, Ardit Bido. Ai është shprehur se kjo kërkesë është “bllof i radhës” i Partisë Demokratike, pasisipas tij përballë KZAZ-së ndodhet edhe zyra e Partisë Demokratike. Ai vijon në reagimin e tij duke u shrehur se qytetarët janë më të zgjuar dhe do dinë për kë të votojnë, ndërsa shton se kjo strategji e PD nuk po funksionon.
“Bllofi i radhës i doktorit erdhi dhe në Trojë: kandidatja nuk shikon selinë e saj
O doktor, prapë bllof?! Çdo ditë do të merresh me mua? Nuk të del koha të merresh me qytetarët, por merresh me mua, çdo mëngjes, si detyrë e parë.
Merr frymë, doktor!
Sot zgjodhe Delvinën për të hedhur baltë. Trojë e quajmë ne që jemi të këtij qyteti, që e kemi në gjak, në zemër, në rrënjë. Dërgove një gocë të mirë të partisë, që s’ka lidhje me Delvinën, të sajojë një “tmerr” pranë KZAZ-së.
Na tregoi se aty ndodhet zyra jonë elektorale… por harroi të shikojë rrotull!
Sepse përballë KZAZ-së ndodhet zyra e Partisë Demokratike. Edhe zyra e kandidates së PD-së, jo më larg se 100 metra.
Doktor, të lutem, mos dil më bllof! Nuk po funksionon. Qytetarët janë më të zgjuar se kaq. E dinë vetë kush punon dhe kush bën teatër. Gënjeshtrat kanë këmbë të shkurtra. Dhe s’mbërrijnë dot në Parlament.
Në Trojë, votojnë trojanët. Dhe ti e di shumë mirë kush do të votohet. S’ke ku të shkosh, përveçse përballë me mua.
Mos u tremb, doktor. Do shihemi në Parlament. Deri atëherë… Mirupafshim!”-shkruan Bido në reagimin e tij.
LEXONI GJITHASHTU:
- Trump vendosi 10% tarifa ndaj Shqipërisë, Berisha: Pas 11 majit, do të negociojmë
- Berisha: Programi ynë i hartuar me ekspertizën më të mirë të SHBA-së dhe Gjermanisë
