PD kërkon në GJK shfuqizimin e ndryshimeve në Rregulloren e Kuvendit: Po na përjashtojnë nga integrimi

Gjykata Kushtetuesja mori në shqyrtim të martën ankesën e Partisë Demokratike për ndryshimin e rregullores së kuvendit që çoi në ndryshimin e numrit të komisioneve të përhershme parlamentare nga 8 në 11.

Në padinë e saj PD-ja pretendon se ndryshimi i funksionimit të parlamentit u bë në mënyrë të njëanshme dhe me procedurë të përshpejtuar.

Opozita pretendon një ndërhyrje të ekzekutivit në legjislativ, pasi shtimi i numrit të komisioneve parlamentare erdhi si një kërkesë e drejtpërdrejt e kryeministrit Edi Rama nga Asambleja Kombëtare e Partisë Socialiste në shtatorin e një viti më parë dhe jo si një kërkesë e vetë kuvendit që është një institucion i pavarur dhe vetë-rregullohet. 

Po aq në ankimin e saj Partia Demokratike deklarohet se e gjithë procedura e ndjekur është në shkelje të rregullores së kuvendit, kushtetutës dhe deputetëve të opozitës iu hoq e drejta për të dhënë qëndrimin e tyre.

Ndryshimi i numrit të komisioneve të përhershme parlamentare me propozim dhe miratim vetëm me votat e socialistëve, çoi në mbylljen e komisionit të ngritur qëllimisht vetëm për çështjet e integrimit të Shqipërisë në Bashkimin Evropian. I ngritur që në kohën kur socialistët ishin në opozitë dhe gjithnjë i drejtuar nga opozita, herë nga PS-ja e herë nga PD-ja, ai u bashkua komisionit të jashtëm.

Pas shqyrtimit në themel dhe dëgjimit të pretendimeve të PD-ës dhe Kuvendit, trupa gjyqësore e “Kushtetueses” është tërhequr për vendimmarrje. 

Pas rregullores së kuvendit, në pritje për shqyrtim nga “Kushtetuesja” janë edhe tre ankime të tjera të demokratëve, ministrja e inteligjencës artificiale “Diella”, dy komisionet hetimore për Mc-Conigal,  zgjedhjet e 11 majit dhe zgjedhja e Avokatit të Popullit.