PD regjistrohet në zgjedhjet e pjesshme të 6 marsit

Partia Demokratike është riregjistruar pranë Komisionit Qendror të Zgjedhjeve për të marrë pjesë në zgjedhjet e pjesshme të 6 marsit.

PD ka paraqitur një vërtetim të datës 24 janar 2022 të Gjykatës së Tiranës, ku thuhet se Lulzim Bash është kryetar i saj.

KQZ në vendimin e saj thotë se Basha është personi i vetëm i autorizuar për të paraqitur emrat e kandidatëve të PD në këto zgjedhje.

Më 6 mars do të votohet për kryetar bashkie në gjashtë bashki të vendit; Durrës, Shkodër, Dibër, Vorë, Lushnjë dhe Rrogozhinë.

Vërtetimi që mban datë 24 janar, sipas regjistrit të partive në gjykatë, Lulzim Basha figuron kryetar i Partisë Demokratike.

Aktualisht në PD ka një debat të hapur për çështjen se kush është kryetar i saj, pasi nga një anë mbështetësit e Berishës pretendojnë se partia aktualisht është pa kryetar pasi Basha është i shkarkuar.

Kurse, Basha nga ana tjetër nuk e njeh Kuvendin Kombëtar të thirrur nga Berisha që votoi për shkarkimin e tij.