PD Vlorë: Mbështesim Dionis Sotën, çdo spekulim i shërben Ramës

Partia Demokratike e Shqipërisë dhe dega e saj në Vlorë kanë deklaruar këtë të hënë mbështetjen e plotë për kandidatin e pavarur Dionis Sota në zgjedhjet e pjesshme vendore.

Përmes një deklarate në rrjetet sociale, kreu i degës së PD-së në Vlorë, Hysni Sharra, theksoi se kjo është një mbështetje pa asnjë ekuivok dhe se kandidatura e Sotas përfaqëson zgjidhjen e duhur për problemet që, sipas tij, janë shkaktuar nga qeverisja e gjatë e Partisë Socialiste.

“Partia Demokratike e Shqipërisë, Dega e Partisë Demokratike Vlorë dhe aleatët e saj janë në këtë fushatë të zgjedhjeve të pjesshme vendore përkrah kandidatit të pavarur, zotit Dionis Sota,” deklaroi Sharra.

Sipas tij, programi, ndershmëria dhe përkushtimi i Sotas janë garancia për një ndryshim të vërtetë në qeverisjen vendore të Vlorës.

“Besojmë se kandidati, programi, ndershmëria dhe përkushtimi për zgjidhjen sa më të shpejtë e të qëndrueshme të problemeve që ‘Rilindja’ dhe qeverisja 27-vjeçare e Partisë Socialiste i kanë shkaktuar Vlorës, do të jenë kryefjala e kësaj fushate,” shtoi më tej kreu i PD-së lokale.

Në deklaratën e tij, Sharra nuk kurseu akuzat ndaj individëve që, sipas tij, po tentojnë të përçajnë opozitën përmes kandidaturave alternative.

“Çdo spekullim, marrëveshje apo ‘kandidim’ i personave të caktuar në emër gjoja të opozitës, është sharlatanizëm, aventurë dhe, patjetër, shërbim ndaj Ramës dhe pushtetit të tij të korruptuar e kriminal,” përfundoi Sharra.

LEXONI GJITHASHTU:

• Gjergji Nika shpall kandidaturën për bashkinë e Vlorës
• Xhamia e Plumbit në Vlorë atraksion turistik, vizitohet nga qindra të huaj