Pedagogët e Durrësit në protestë, Beqja: Pagat të na rriten nga buxheti i shtetit

Pedagogët e Universitetit të Durrësit janë ngritur sot në protestë, ku kërkojnë rritje të pagave.

Pedagogu Mentor Beqja u shpreh për Euronews Albania se kërkojnë që pagat e tyre të rriten nga buxheti i shtetit dhe jo nga tarifat që paguajnë studentët.

Ai kërkoi që studentët duhet t’i bashkohen pedagogëve në këtë protestë.

“Shpresojmë që Ministria e Arsimit dhe qeveria shqiptare të kenë guximin për të reflektuar. Padyshim që qeveria ka problemet e saj, por kërkesat tona janë të realizueshme. Studentët duhet të kuptojnë diçka, vendimi i fundit i qeverisë, i ngarkon ata për gjysmën e rritjes së pagës së pedagogëve. Ne kërkojmë që pagat e pedagogëve të rriten nga buxheti i shtetit. Të ardhurat dytësore të universiteteve, që janë të ardhura nga tarifat e studentëve nuk duhet të përdoren për rritjen e pagës së pedagogëve. Barrën e rritjes e rritjes së pagës së pedagogëve e ka kaluar nga vetja tek studentët. Studentët duhet të solidarizohen me pedagogët”, u shpreh ai.

Më 5 tetor, ministrja e Arsimit, Evis Kushi tha se qeveria ka vendosur që pagat e pedagogëve të rriten me 15 për qind, nga të cilat 7 për qind do të mbulohen nga buxheti i shtetit.

“Universitetet me autonominë që gëzojnë mund të propozojnë rritje mbi kufirin minimal, të cilën mund ta mbulojnë me të ardhurat e tyre”, u shpreh ministrja.

LEXONI GJITHASHTU:

• Kushi: Pagat e pedagogëve do të rriten me 15 për qind
• 9 kërkesat e pedagogëve
• Rama u përgjigjet pedagogëve: Të mërkurën rrisim pagën 7%