Pelegrinazh në Teqenë e Shenjtë të Turballi Sulltanit, mblidhen në Larisa të Greqisë besimtarët

E shndërruar në një traditë disavjeçare, pelegrinazhi i Teqesë së Shenjtë Bektashiane të Turballi Sulltanit mblodhi në Larisa të Greqisë besimtarë nga Shqipëria, Maqedonia e Veriut, Bullgaria, Hungaria, Turqia dhe vetë Greqia. Besimtarët, edhe pse në kushte jo të favorshme moti, u lutën në këtë vend të shenjtë.

Pas respektimit të himneve kombëtare të Greqisë, Shqipërisë dhe atij Botëror Bektashian, Shenjtëria e Tij, Haxhi Dede Baba Edmond Brahimaj, e vlerësoi këtë tempull si një urë lidhëse midis besimeve dhe popujve.

Kryegjyshi Botëror vlerësoi gjithashtu kontributin e shqiptarëve në ruajtjen e identitetit kombëtar.

Ai shprehu besimin se, nëpërmjet mirëkuptimit, bashkëpunimit dhe rrugëve ligjore, do të mundësohet afirmimi i plotë i identitetit të kësaj teqeje si pjesë e trashëgimisë së Selisë së Shenjtë të Kryegjyshatës Botërore Bektashiane.

Në përfundim të ceremonisë nuk mungoi lutja për paqe, dashuri dhe vëllazëri mes njerëzve, duke përçuar një mesazh shprese për shoqërinë e sotme njerëzore.