“Pelikanët e uritur”, misteriozi Banksy konfirmon veprën e pestë të artit në Londër

Mesa duket ekspozita me kafshët në Londër duket se do të vazhdojë. Banksy, artisti që askush se njeh, ka pranuar me anë të një postimi në Instagram autorsinë e një tjetre vepre arti, në të duken dy siluetat e pelikanëve të cilët po ushqehen me peshq.

Njëri prej tyre madje duket sikur po ia grabit peshkun restorantit sipër të cilit është pikturuar.

Ashtu si me veprat e zbuluara që prej nisjes së javës artisti nuk dha asnjë sugjerim për një kuptim më të thellë, ai thjesht ka postuar një imazh të veprës pa mbishkrim.

Në internet, shumë kanë spekuluar për rëndësinë e kësaj serie kafshësh.

Duke pasur parasysh trazirat e fundit të së djathtës ekstreme në MB, një teori popullore sugjeron se Banksy po kritikon sjelljen e egër dhe kaotike që po shpaloset aktualisht, duke tërhequr një paralele midis veprimeve të njerëzve dhe kafshëve të egra të kopshtit zoologjik. Të tjerë e interpretojnë atë si një koment mbi ndryshimet klimatike dhe ndikimin e urbanizimit në jetën e egër.

Pelikanët vijnë pasi artisti anonim i rrugës i lindur në Bristol zbuloi një “Ujk ulëritës” në majë të një ndërtese në Peckham, në juglindje të Londrës, dje (8 gusht të enjten).

Brenda pak orësh nga debutimi i saj, vepra artistike u hoq nga dy individë të maskuar, të cilët u ngjitën në një shkallë për të marrë antenën në të cilën vepra ishte pikturuar. Fotot e shpërndara në internet tregojnë një burrë me kapuç të zi, tuta blu, maskë dhe doreza, duke mbajtur veprën e artit nën sqetull ndërsa largohet.

Saga e Banksy me temën e kafshëve filloi të hënën më 5 gusht. Artisti prezantoi punën e parë të serisë së kafshëve pranë urës Kew në jugperëndim të Londrës. Pjesa, e krijuar në stilin e tij përshkruan një dhi me gurë që bien poshtë saj.

Pas punës së parë, Banksy postoi një imazh të një vepre tjetër të kafshëve në faqen e tij në Instagram ditën tjetër. Këtë herë në Chelsea, puna paraqiti dy elefantë që shikonin njëri-tjetrin nga dritaret e bllokuara, me trungjet e tyre pothuajse duke u prekur.

Të mërkurën, tre majmunë u shfaqën përgjatë një ure hekurudhore në Brick Lane, në Londrën Lindore.

LEXONI GJITHASHTU:

• Kafshët “pushtojnë” ndërtesat e Londrës, Banksy surprizon me një tjetër murale
• Rishfaqet artisti misterioz Banksy, veprat e tij mbulojnë ndërtesat e Londrës