Përçapjet diplomatike të SHBA për luftën në Izrael, pse Erdogan nuk e priti Blinken

Gjatë një vizite në Ankara, Sekretari Amerikan i Shtetit është përpjekur të qetësojë zemërimin e Turqisë për mbështetjen që vendi i tij i ofron Izraelit.

Por Antony Blinken ia ka përcjellë mesazhet e Uashingtonit ministrit të Jashtëm turk dhe jo direkt presidentit Erdogan. Vendimi i këtij të fundit për të mos e pritur shefin e diplomacisë amerikane është konsideruar si shpërfillje.

Gjatë fundjavës, Blinken u takua me lider të tjerë rajonalë, përfshirë presidentin palestinez Mahmoud Abbas në Bregun Perëndimor. Deri tani, Amerika ka hedhur poshtë thirrjet e vendeve arabe për t’i bërë presion Izraelit për një armëpushim.

Blinken u njoh gjithashtu me lutjet për një ndërprerje humanitare të sulmeve gjatë një vizite surprizë në Irak, ku u takua me kryeministrin e vendit. Mbërritja e tij shkaktoi protesta të ashpra nga mijëra qytetarë në Bagdad.

Më vonë, kreu i qeverisë irakene e diskutoi luftën në Gaza me presidentin iranian Ebrahim Raisi gjatë një vizite në Teheran. Republika Islamike ka akuzuar Shtetet e Bashkuara se mbështet ato që i quan “krimet e luftës së Izraelit” ndaj palestinezëve.

LEXONI GJITHASHTU:

• Blinken thotë se SHBA-ja punon për ndihmën humanitare për Gazën
• Seri shpërthimesh në Gaza, ushtria izraelite “ndan në dysh” brezin detar