Përçarjet brenda PD, profesor Fuga: Basha nuk po pozicionohet si lider, s’ka negociata

Profesor Artan Fuga deklaroi për “Mirëmëngjes” në Euronews Albania se Basha nuk po pozicionohet si duhet pas zhvillimeve të fundit në PD.

Sipas tij, kreu i Partisë Demokratike duhet të marrë pikërisht rolin e kryetarit dhe jo të bëhet palë.

“Zoti Basha u soll si palë në kuptimin që unë dhe ata që janë me mua dhe pala tjetër që janë ata që janë kundër meje. Jo, nuk ishte ky pozicioni që i takonte zotit Basha dhe këtu u pozicionua gabim,” – tha Fuga.

Në këndvështrimin e profesorit mbyllja e dyerve në PD, do të bëjë të mundur një shfaqje të shëmtuar më 8 janar atëherë kur Berisha ka thirrur protestën kombëtare.

Ndërsa, e klasifikoi veten si dikush që i dhimbset opozita dhe demokracia e vendit, Fuga theksoi se nuk do të ketë negociata.

“Çdo negocim është tani një mbarim i Partisë Demokratike dhe një delegjitimim  i të dy këtyre grupimeve,” – tha ai.

Së fundmi profesor Fuga uroi që të ketë përçarje edhe brenda Partisë Socialiste në mënyrë që të bëhet i mundur legjitimimi i zërave që mendojnë ndryshe.

LEXONI GJITHASHTU:

• Besnik Aliaj: Ka një grup të tretë brenda PD që s’janë as me Berishën, as me Bashën
• Flamur Noka: Më 8 janar do e kthejmë selinë e PD-së në shtëpinë e lirisë
• Deputet e Komisionit të Rithemelimit të PD shkojnë në seli, Bardhi: Spektakël mediatik