Përfundon misioni ‘Inspiration4’, rikthehet nga hapësira ekuipazhi i parë me turistë

Ekuipazhi me turistë i SpaceX është rikthyer me sukses në Tokë pas tre ditëve në hapësirë ku udhëtuan rreth e rrotull globit. 

Ekipi i “Inspiration4” u ul në ujërat e oqeanit Atlantik pranë Florida-s, duke përfunduar me sukses misionin e tyre historik.

“Ky mision i ka treguar botës se hapësira është për të gjithë ne”, kështu është shprehur kompania SpaceX.

Komandanti i misionit Jared Isaacman tha përmes radios menjëherë pas uljes se “ky ishte një udhëtim i paparë”.

Nuk mungoi edhe komenti i Elon Musk, i cili shkroi në Twitter: “Urime @ Inspiration4x !!!”

Katër anëtarët e ekuipazhit u nxorën nga kapsula hapësinore dhe hipën në një helikopter për t’u ribashkuar me familjet e tyre.

Inspiration4 është misioni i parë i drejtuar vetëm nga civilët dhe një hap i madh në turizmin hapësinor nga një kompani private.

Ekuipazhi i turistëve u nis të mërkurën dhe preku Tokën mbrëmjen e djeshme rreth orës 23:00.

Turistët udhëtuan në mungesë të peshës, deri në lartësinë 575 km. Gjatë tre ditëve të udhëtimit kapsula u rrotullua rreth globit 15 herë në ditë.

Kapsula u krijon turistëve mundësinë të vëzhgojnë pamje spektakolare të Tokës.